સૂર્ય પર પૃથ્વી કરતા ૧૫ ગણું વિશાળ 'સનસ્પોટ' દેખાયું | જાણો પૃથ્વી પર તેની શું અસર થશે અને કેમ જોવું જોખમી છે?

ભુજ, કચ્છ: Kutch Bulletin ના અહેવાલ મુજબ, છેલ્લા બે દિવસથી સૂર્યાસ્ત સમયે આકાશમાં સૂર્યની સપાટી પર એક કાળો ડાઘ જોવા મળી રહ્યો છે. આ કોઈ સામાન્ય ડાઘ નથી પરંતુ સૂર્ય પર સર્જાયેલું પૃથ્વી કરતા અનેકગણું વિશાળ પ્રચંડ ચુંબકીય તોફાન છે, જેને ખગોળ વિજ્ઞાનમાં 'સનસ્પોટ AR4366' તરીકે ઓળખવામાં આવે છે.

પૃથ્વી કરતા ૧૫ ગણું મોટું કદ

સ્ટારગેજીંગ ઈન્ડિયાના નરેન્દ્ર ગોર સાગર દ્વારા આપવામાં આવેલી તસવીરો અને વિગતો મુજબ, આ સનસ્પોટ વિસ્તાર પૃથ્વીના વ્યાસ કરતા આશરે ૧૦ થી ૧૫ ગણો મોટો છે. આ આખો સનસ્પોટ સમૂહ સૂર્યની સપાટી પર આશરે ૧,૨૫,૦૦૦ થી ૧,૫૦,૦૦૦ કિમી કરતાં પણ વધુ વિસ્તારમાં ફેલાયેલો છે. આટલા વિશાળ વિસ્તારમાં પૃથ્વી જેવા અનેક ગ્રહો સમાઈ શકે તેમ છે.

સેટેલાઈટ અને મોબાઈલ નેટવર્ક પર ખતરો

આ સનસ્પોટ વિસ્તારમાંથી હાલમાં જ શક્તિશાળી 'X-ક્લાસ' સૌર જ્વાળાઓ (Solar Flares) છૂટી પડી છે. જેના કારણે આગામી ૪૮ કલાકમાં પૃથ્વી પર જીઓમેગ્નેટિક સ્ટોર્મ (Geomagnetic Storm) આવવાની શક્યતા છે. આ તોફાન પૃથ્વીની આસપાસ ફરતા સેટેલાઈટ્સ, GPS સેવાઓ અને મોબાઈલ નેટવર્ક જેવી સેવાઓને અસર કરી શકે છે.

નરી આંખે જોવું કેમ જોખમી?

ખગોળશાસ્ત્રી નરેન્દ્ર ગોરે ચેતવણી આપતા જણાવ્યું છે કે, સૂર્યાસ્ત સમયે સૂર્યની તેજસ્વીતા ઓછી લાગતી હોવા છતાં, તેને નરી આંખે અથવા સામાન્ય ચશ્માથી જોવો અત્યંત જોખમી છે. સૂર્યમાંથી નીકળતા પારજાંબલી (UV) અને ઇન્ફ્રારેડ કિરણો આંખના પડદા (Retina) ને કાયમી નુકસાન પહોંચાડી શકે છે. સૂર્યદર્શન માટે હંમેશા પ્રમાણિત સોલર ફિલ્ટર અથવા સોલર ગોગલ્સનો જ ઉપયોગ કરવો જોઈએ.

---

વધુ વાંચો:

• કચ્છ સરહદે શક્તિપ્રદર્શન: સંરક્ષણ સચિવની ભુજ મુલાકાત; એક્સરસાઇઝ 'તટરક્ષા'
• ગુજરાત TAT-HS 2026: શિક્ષકોની ભરતી માટે ટાટ પરીક્ષાની જાહેરાત
• રાપર: બેલાના હનુમાનવાંઢ પાસે માલધારીનું ડૂબી જવાથી કરુણ મોત
• ભુજ: આંગણવાડી કાર્યકરોનો હલ્લાબોલ; વેતન વધારા મુદ્દે કલેક્ટરને રજૂઆત

---

વિજ્ઞાન અને કચ્છના ગ્રાઉન્ડ રિપોર્ટ માટે જોડાઓ:
👉 Join Kutch Bulletin on WhatsApp