Kutch Bulletin: અમેરિકન પ્રમુખ ડોનાલ્ડ ટ્રમ્પે ન્યાયતંત્ર સામે આરપારની જંગ છેડી દીધી છે. સુપ્રીમ કોર્ટ દ્વારા તેમના જૂના ટેરિફને ગેરકાયદેસર જાહેર કર્યાના ગણતરીના કલાકોમાં જ ટ્રમ્પે વળતો પ્રહાર કરતા તમામ દેશો પર 10% વૈશ્વિક ટેરિફ લાદવાનો આદેશ કરી દીધો છે.
અમેરિકન સુપ્રીમ કોર્ટે 6-3 ના બહુમતી ફેંસલામાં ટ્રમ્પના અગાઉના ટેરિફને રદબાતલ ઠેરવ્યા હતા. કોર્ટે જણાવ્યું હતું કે કોંગ્રેસની મંજૂરી વિના પ્રમુખ પાસે આ પ્રકારના ટેરિફ લાદવાની સત્તા નથી. જોકે, આ નિર્ણયથી નારાજ ટ્રમ્પે ઓવલ ઓફિસથી 'ટ્રેડ એક્ટ 1974' ની કલમ 122 નો ઉપયોગ કરીને નવો આદેશ જારી કર્યો છે.
150 દિવસની અગ્નિપરીક્ષા
આ નવો ટેરિફ હાલમાં 150 દિવસ એટલે કે અંદાજે પાંચ મહિના સુધી પ્રભાવી રહેશે. આ સમયગાળા દરમિયાન ટ્રમ્પ પ્રશાસન અન્ય દેશો પર કાયમી ટેરિફ નક્કી કરવા માટે જરૂરી તપાસ કરશે. ટ્રમ્પે સોશિયલ મીડિયા પર લખ્યું કે, "મને જણાવતા ગર્વ થાય છે કે મેં તમામ દેશો પર 10% ગ્લોબલ ટેરિફ પર હસ્તાક્ષર કર્યા છે, જે તત્કાળ અસરથી અમલમાં આવશે."
અબજો ડોલરના રિફંડ પર અનિશ્ચિતતા
સુપ્રીમ કોર્ટના આંચકા બાદ, ગયા વર્ષે ટેરિફ દ્વારા વસૂલવામાં આવેલા અંદાજે 175 અબજ ડોલરના મહેસૂલ પર સવાલો ઊભા થયા છે. આ રકમ આયાતકારોને પરત (Refund) કરવી પડશે કે કેમ તે અંગે ટ્રમ્પે જણાવ્યું કે આ મામલો હજુ બે વર્ષ સુધી કોર્ટમાં ચાલશે. ટ્રમ્પે હળવા અંદાજમાં કહ્યું કે, "હું વેપાર નષ્ટ કરી શકું છું, તો શું હું 1 ડોલરનો ટેરિફ ન લાદી શકું? આ મૂર્ખામીભર્યું છે."
હવે ટ્રમ્પ પ્રશાસન રાષ્ટ્રીય સુરક્ષા (કલમ 232) અને અયોગ્ય વ્યાપાર નીતિઓ (કલમ 301) હેઠળ પણ નવા ટેરિફ લાદવાની તૈયારી કરી રહ્યું છે, જેનાથી વૈશ્વિક શેરબજારો અને વેપાર પર મોટી અસર પડી શકે છે.
વધુ વાંચો:
- આજનું રાશિફળ: 21 ફેબ્રુઆરી 2026, જાણો તમારી રાશિ શું કહે છે
- 4 કરોડના દારૂ કેસમાં મોટી કાર્યવાહી: પધ્ધર PI અને PSI સસ્પેન્ડ
વૈશ્વિક અને સ્થાનિક સમાચારની ઝડપી અપડેટ્સ માટે:
👉 Join Kutch Bulletin on WhatsApp
0 ટિપ્પણીઓ