Kutch Bulletin Desk | Ahmedabad Cyber Crime Snapchat Fraud
'Friendship' on social media proves costly: Young woman arrested in Ahmedabad for swindling several people under the pretext of medical expenses.
વિવિધ સોશિયલ મીડિયા પ્લેટફોર્મ પર છેતરપિંડીની નવી મોડસ ઓપરેન્ડી; મહિલાઓ મિત્રતા કેળવીને ઘરખર્ચ કે ઈલાજના નામે ₹૧૦,૦00 સુધીની રકમ પડાવતી હોવાનો ખુલાસો.
અમદાવાદના સેટેલાઇટ વિસ્તારના યુવક પાસે સ્નેપચેટ પર સંપર્ક કરી ટુકડે-ટુકડે નાણાં પડાવ્યા, પાછા માંગતા જ પોલીસ કેસની ધમકી આપી.
પોલીસ તપાસમાં બહાર આવ્યું કે શાતિર યુવતીએ મેડિકલ બહાના હેઠળ ૭ થી ૮ લોકોને શિકાર બનાવી કુલ ₹૯૦,૦૦૦ ઓનલાઇન ખંખેરી લીધા હતા.
Kutch Bulletin - ભુજ : ગુજરાત સહિત દેશભરમાં વિવિધ સોશિયલ મીડિયા પ્લેટફોર્મ પર છેતરપિંડીની એક તદ્દન નવી અને ચોંકાવનારી મોડસ ઓપરેન્ડી મોટા પ્રમાણમાં સામે આવી છે. જેમાં કેટલીક યુવતીઓ કે મહિલાઓ સોશિયલ મીડિયા પર પુરુષો સાથે પહેલા મીઠી-મીઠી વાતો કરીને મિત્રતા કેળવે છે અને ત્યારબાદ ઈમરજન્સી ઘરખર્ચ કે હોસ્પિટલના ખર્ચના બહાને ₹૫,૦૦૦ થી ₹૧૦,૦૦૦ સુધીની નાની રકમ મેળવીને પરત આપતી નથી. આ પ્રકારના હનીટ્રેપ અને ફ્રોડના કિસ્સામાં સતત વધારો થતાં સાયબર ક્રાઇમ સેલના ઉચ્ચ અધિકારીઓએ લોકોને આવી છેતરપિંડીથી સતર્ક રહેવા માટે કડક તાકીદ કરી છે.
સ્નેપચેટ પર મેડિકલ ખર્ચના બહાને અમદાવાદમાં ખેલ ખેલાયો
આ નવી મોડસ ઓપરેન્ડીનો ભોગ બનેલો એક કિસ્સો અમદાવાદ શહેરના પોશ સેટેલાઇટ વિસ્તારમાંથી સામે આવ્યો છે. અહીં રહેતા એક જાગૃત યુવકે સોશિયલ મીડિયા સાઇટ સ્નેપચેટ (Snapchat) પર પોતાની પ્રોફાઇલ મૂકી હતી. જેમાં ઓનલાઇન ફ્રેન્ડ રિક્વેસ્ટ દ્વારા કેટલાક લોકો મિત્રો બન્યા હતા, જે પૈકી એક પરિણીત યુવતીએ થોડા દિવસ સુધી આ યુવક સાથે નિયમિત વાતો કરીને તેનો પૂર્ણ વિશ્વાસ જીતી લીધો હતો. વિશ્વાસ કેળવાઈ ગયા બાદ યુવતીએ પોતાની મજબૂરી બતાવી દવાના ખર્ચ માટે તાત્કાલિક ₹૫,૦૦૦ ની માંગણી કરી હતી. આ નાણાં માત્ર ૪ થી ૫ દિવસમાં જ પરત કરી દેવાની ખાતરી આપવામાં આવી હતી. પરિણીત યુવતી પણ અમદાવાદ લોકલ વિસ્તારમાં જ રહેતી હોવાથી યુવકે માનવતાના ધોરણે નાણાં ઓનલાઇન ટ્રાન્સફર કર્યા હતા.
પૈસા પરત માંગતા જ ફસાવી દેવાની ધમકી આપી!
જો કે, ૫ દિવસ વીતી ગયા બાદ તે યુવતીએ નાણાં પરત કરવાને બદલે મેડિકલનું વધુ એક નવું કારણ આપીને બીજા ₹૨,૦૦૦ ની માંગણી કરી હતી અને તમામ નાણાં તેના પતિનો પગાર આવે ત્યારે એકસાથે ચૂકવી આપવાનો વાયદો કર્યો હતો. પરંતુ, ત્યારપછી પણ યુવતીએ નાણાં ચૂકવવામાં ઠાગાઠૈયા શરૂ કર્યા હતા. બીજી તરફ યુવકે પોતાના પૈસા પરત મેળવવા વારંવાર ફોન કરતાં, આ શાતિર યુવતીએ તેને પોલીસ કેસ કરવાની અને બદનામ કરવાની ધમકી આપી દીધી હતી કે તે એક પરિણીત યુવતીને ખોટી રીતે હેરાન પરેશાન કરી રહ્યો છે.
સાયબર પોલીસની એન્ટ્રી થતાં જ ભાંડો ફૂટ્યો
યુવતીની ધમકીથી ડરવાને બદલે યુવકે હિંમત દાખવી સાયબર પોલીસની મદદ માંગી હતી. પોલીસે આ મામલે સત્તાવાર અરજી લઇને કાયદેસરની કાર્યવાહી શરૂ કરતાં જ અંતે યુવતી લાઇન પર આવી ગઈ હતી અને તેણે નાણાં પરત ચૂકવી દીધા હતા. જો કે, પોલીસ દ્વારા જ્યારે આ પ્રોફાઇલ અને બેંક ટ્રાન્ઝેક્શનની ઊંડી તપાસ કરવામાં આવી ત્યારે ચોંકાવનારો ખુલાસો થયો હતો. આ યુવતીએ માત્ર આ એક યુવકને જ નહીં, પરંતુ મેડિકલ ટ્રીટમેન્ટનું ખોટું બહાનું આપીને આશરે ૭ થી ૮ નિર્દોષ લોકોને પોતાના જાળમાં ફસાવ્યા હતા અને અલગ-અલગ વ્યક્તિ પાસેથી ₹૧૦,૦૦૦ સુધીની રકમ મેળવીને કુલ ₹૯૦,૦૦૦ રૂપિયા ઓનલાઇન પડાવી લીધા હતા.
નાની રકમની છેતરપિંડીના આ ટ્રેન્ડથી સાવધાન રહો
સાયબર ક્રાઇમ સેલના અધિકારીઓના જણાવ્યા મુજબ હાલમાં સ્નેપચેટ અને ફેસબુક (Facebook) માં આ પ્રકારની છેતરપિંડી સૌથી વધુ પ્રમાણમાં થઇ રહી છે. આ ગુનાની ખાસિયત એ છે કે ગુનેગારો દ્વારા માંગવામાં આવતી રકમ ખૂબ નાની હોવાથી મોટાભાગના લોકો સામાજિક પ્રતિષ્ઠા અને કોર્ટ-કચેરીના ડરથી પોલીસ ફરિયાદ કરવાનું ટાળે છે. ગ્રાહકો કે ભોગ બનનાર સામેથી ફરિયાદ નથી કરતા, તેનો ફાયદો ઉઠાવીને આ યુવતીઓ કે કેટલીક સંગઠિત ગેંગો યુવતીઓના નામે ફેક પ્રોફાઇલ બનાવીને આ મોડસ ઓપરેન્ડી નિયમિત રીતે અપનાવે છે. સાયબર સેલે જનતાને અપીલ કરી છે કે સોશિયલ મીડિયા પર અજાણ્યા પાત્રો સાથે ક્યારેય નાણાકીય વ્યવહાર ન કરવો અને ઓનલાઇન 'મિત્રતા' માં અતિશય અંધ વિશ્વાસ ન રાખવો.
વધુ વાંચો:
કચ્છની અસ્મિતા અને ગૌરવવંતા સમાચારો સૌથી પહેલા મેળવવા માટે આજે જ જોડાઓ:
Join Kutch Bulletin on WhatsApp
0 ટિપ્પણીઓ