નવી દિલ્હી: Kutch Bulletin ના તમામ વાચકો માટે સોશિયલ મીડિયા વાપરતા પહેલા જાણવા જેવા અગત્યના સમાચાર સામે આવ્યા છે. ભારત સરકારે આર્ટિફિશિયલ ઈન્ટેલિજન્સ (AI) અને ડીપફેક દ્વારા ફેલાતી ખોટી માહિતીને ડામવા માટે ૨૦ ફેબ્રુઆરીથી નવા અને કડક નિયમો અમલી બનાવવાની જાહેરાત કરી છે.
હવે ૩૬ કલાક નહીં, માત્ર ૩ કલાકમાં હટાવવું પડશે કન્ટેન્ટ
સરકારના નવા નિયમો મુજબ, સોશિયલ મીડિયા પ્લેટફોર્મ્સે હવે કોઈપણ વાંધાજનક કે ફેક AI કન્ટેન્ટની જાણ થયાના માત્ર ૩ કલાકની અંદર જ તેને હટાવવું પડશે. અગાઉ આ સમય મર્યાદા ૩૬ કલાકની હતી. સરકારનું માનવું છે કે ડીપફેક વીડિયો કે ઓડિયો થોડા જ સમયમાં મોટું નુકસાન કરી શકે છે, તેથી આ કડક નિર્ણય લેવામાં આવ્યો છે.
AI જનરેટેડ લેબલ ફરજિયાત
હવેથી કોઈપણ યુઝર જો AI દ્વારા બનાવેલો ફોટો, વીડિયો કે ઓડિયો પોસ્ટ કરશે, તો તેની સાથે 'AI Generated' નું લેબલ લગાવવું ફરજિયાત રહેશે. સોશિયલ મીડિયા કંપનીઓએ એવા ટૂલ્સ વિકસાવવા પડશે જે આપમેળે આવા કન્ટેન્ટની ઓળખ કરી શકે અને તેની ડિજિટલ ઓળખ સાબિત કરી શકે.
ગંભીર ગુનાઓ બદલ થશે કડક કાર્યવાહી
નવા નિયમો હેઠળ નીચે મુજબના કિસ્સામાં આઈટી એક્ટ, ક્રિમિનલ કાયદા અને પોક્સો (POCSO) હેઠળ કાર્યવાહી થઈ શકશે:
- બાળકોના જાતીય શોષણ સંબંધિત AI કન્ટેન્ટ.
- મંજૂરી વિના બનાવેલી અંગત તસવીરો કે ડીપફેક વીડિયો.
- હિંસક કન્ટેન્ટ કે હથિયારો બતાવતી ફેક પોસ્ટ.
- નકલી દસ્તાવેજો કે ભ્રામક પ્રોપેગેંડા.
જો સોશિયલ મીડિયા કંપનીઓ આ નિયમોનું પાલન કરવામાં નિષ્ફળ જશે, તો તેમને અત્યાર સુધી મળતી 'કાયદાકીય સુરક્ષા' (Safe Harbour) ખતમ કરી દેવામાં આવશે અને પ્લેટફોર્મને સીધું જ જવાબદાર ઠેરવી કાર્યવાહી કરાશે.
વધુ વાંચો:
- આજનું પંચાંગ અને રાશિભવિષ્ય: ૧૧ ફેબ્રુઆરી ૨૦૨૬
- વિશ્વમાં પ્રથમવાર ગાંધીધામથી રેલવેનો ઐતિહાસિક પ્રયોગ
- સની દેઓલે પોર્શે ૯૧૧ સાથે ‘રોડ ટુ હેવન’ પર માણી સફર
દેશ-દુનિયાની આવી જ જાગૃત કરતી અપડેટ્સ માટે જોડાઓ:
👉 Join Kutch Bulletin on WhatsApp
0 ટિપ્પણીઓ