Kutch Bulletin Desk | સ્થાનિક સમાચાર / બિઝનેસ
A firecracker market will be set up near Accord Hospital on Mundra Road in Bhuj.
દિવાળી પર્વ નિમિત્તે ભુજ અને માધાપરમાં ૫૭ હંગામી સ્ટોલ અને ૨૩ દુકાનોમાં આતશબાજીનું થશે વેચાણ
કચ્છ બુલેટીન - ભુજ : દીપોત્સવીના મહાપર્વને હવે ગણતરીના દિવસો જ બાકી રહ્યા છે ત્યારે કચ્છીમાડુઓમાં ભારે ઉત્સાહ જોવા મળી રહ્યો છે. તહેવારોની રોનક વચ્ચે આ વર્ષે ભુજ શહેરના વેપાર-વાણિજ્યમાં એક નવો સાહસિક ફેરફાર જોવા મળશે. અત્યાર સુધી ભુજમાં પરંપરાગત રીતે મિરજાપર રોડ પર ફટાકડા બજાર ભરાતી હતી, પરંતુ આ વખતે સૌપ્રથમ વાર મુંદરા રોડ પર આવેલી એકોર્ડ હોસ્પિટલ નજીકના દક્ષિણ તરફના મેદાનમાં ધમધમતી ફટાકડા બજારનું આયોજન કરવામાં આવી રહ્યું છે. આ નવા સ્થળે હંગામી ધોરણે ૨૬ જેટલા સ્ટોલ ઊભા કરવા માટેની વહીવટી પ્રક્રિયા આખરી તબક્કામાં પહોંચી છે.
માધાપરમાં પણ ૩૧ હંગામી સ્ટોલ થશે કાર્યરત
સાથે જ ભુજના સમીપ ગણાતા માધાપર વિસ્તારમાં પણ પર્વની ઉજવણીને ધ્યાને રાખીને યક્ષ મંદિરની બિલકુલ સામે વિશાળ ફટાકડા બજાર આકાર લઈ રહી છે. માધાપર ખાતે યોજાનારી આ બજારમાં કૂલ ૩૧ હંગામી સ્ટોલ તૈયાર કરવામાં આવશે. આમ, ભુજના ૨૬ અને માધાપરના ૩૧ મળીને કુલ ૫૭ હંગામી સ્ટોલ માટે વેપારીઓ દ્વારા રજૂ કરવામાં આવેલી અરજીઓ પર શહેર મામલતદાર દ્વારા સકારાત્મક અભિપ્રાય આપીને આગળની મંજૂરી અર્થે પ્રાંત અધિકારીશ્રીને ફાઇલ મોકલી આપવામાં આવી છે. ટૂંક સમયમાં જ તમામ અરજદારોને સત્તાવાર લાયસન્સ આપી દેવાશે, જેથી બજાર પૂર્ણપણે કાર્યરત થઈ શકે.
કાયમી દુકાનો પર પણ ફટાકડાનો મબલખ સ્ટોક સજ્જ
આ હંગામી બજારો ઉપરાંત ભુજ શહેરમાં ૧૭ તેમજ માધાપર અને મિરજાપરમાં ૩-૩ મળીને કુલ ૨૩ કાયમી દુકાનો પર પણ ફટાકડાનો મબલખ સ્ટોક સજાવી દેવાયો છે. ગ્રાહકોની અલગ-અલગ પસંદગી અને બજેટને ધ્યાનમાં રાખીને નાના બાળકો માટેની તણખલા, ચકરડી અને ફુલઝરીથી લઈને મોટા અવાજના ધમાકા તેમજ આકાશને રંગબેરંગી રોશનીથી ભરી દેતી આકર્ષક આતશબાજીની અવનવી વેરાયટીઓ ઉપલબ્ધ કરાવાઈ રહી છે. તહેવારો નજીક આવતાં જ બજારોમાં ગ્રાહકોની અવરજવર શરૂ થઈ ગઈ છે, જેના કારણે આગામી દિવસોમાં આતશબાજી ખરીદવા માટે ભારે ધસારો રહેશે તેવી આશા વેપારી આલમ સેવી રહ્યો છે.

0 ટિપ્પણીઓ