નવી દિલ્હી: Kutch Bulletin ના આર્થિક અહેવાલ મુજબ, ભારતીય રિઝર્વ બેંક (RBI) એ ડિજિટલ ટ્રાન્ઝેક્શન કરતા ગ્રાહકો માટે એક ઐતિહાસિક જાહેરાત કરી છે. RBI ગવર્નર શ્રી સંજય મલ્હોત્રાએ શુક્રવારે જણાવ્યું હતું કે, નાની રકમના ફ્રોડ ટ્રાન્ઝેક્શનમાં થયેલા નુકસાન માટે ગ્રાહકોને ₹25,000 સુધીનું વળતર આપવા માટે નવું માળખું તૈયાર કરવામાં આવશે.
₹25,000 સુધીનું વળતર અને ગ્રાહક સુરક્ષા
RBI ગવર્નરે ચાલુ નાણાકીય વર્ષની છેલ્લી બેઠક બાદ પત્રકારોને સંબોધતા કહ્યું કે, ગ્રાહકોના હિતોના રક્ષણ માટે ત્રણ નવી માર્ગદર્શિકા જાહેર કરાશે. જેમાં સૌથી મહત્વનો મુદ્દો અનધિકૃત ઇલેક્ટ્રોનિક બેંકિંગ ટ્રાન્ઝેક્શનમાં ગ્રાહકની જવાબદારી મર્યાદિત કરવાનો છે. જો ગ્રાહક સાથે કોઈ નાણાકીય છેતરપિંડી થાય છે, તો તેને ₹25,000 સુધીનું વળતર મળી શકે તેવું માળખું પ્રસ્તાવિત છે.
વરિષ્ઠ નાગરિકો માટે વિશેષ સુરક્ષા: 'વિલંબિત ક્રેડિટ'
ડિજિટલ પેમેન્ટને વધુ સુરક્ષિત બનાવવા RBI 'વિલંબિત ક્રેડિટ' (Delayed Credit) ની સુવિધા પણ લાવી શકે છે. આ વ્યવસ્થા હેઠળ, અમુક ટ્રાન્ઝેક્શનમાં પૈસા મેળવનારના ખાતામાં જાણીજોઈને થોડીવાર પછી જમા કરવામાં આવશે. ખાસ કરીને વરિષ્ઠ નાગરિકો માટે વધારાની પ્રમાણીકરણ (Verification) પ્રક્રિયા ઉમેરવાનું પણ વિચારવામાં આવી રહ્યું છે, જેથી છેતરપિંડી અટકાવી શકાય.
ખોટા વેચાણ (Mis-selling) અને રિકવરી એજન્ટ પર લગામ
RBI એ બેંકો દ્વારા ગ્રાહકોને તેમની જરૂરિયાત વગરના વીમા કે અન્ય પ્રોડક્ટ્સ પધરાવી દેવા (Mis-selling) સામે પણ લાલ આંખ કરી છે. ગવર્નરે સ્પષ્ટ કર્યું કે, બેંક કાઉન્ટર પર વેચાતી સર્વિસ ગ્રાહકની જોખમ લેવાની ક્ષમતાને અનુરૂપ હોવી જોઈએ. આ ઉપરાંત, લોન રિકવરી માટે રિકવરી એજન્ટોના વર્તન બાબતે પણ નવા કડક દિશાનિર્દેશો જારી કરવામાં આવશે.
નોંધનીય છે કે, વર્ષ 2017 માં ગ્રાહક જવાબદારી નક્કી કરતા નિયમો જારી થયા હતા, જેની હવે ટેકનોલોજીના બદલાતા યુગ સાથે સમીક્ષા કરવામાં આવી રહી છે. સુધારેલા નિર્દેશોનો ડ્રાફ્ટ ટૂંક સમયમાં જાહેર કરવામાં આવશે.
વધુ વાંચો:
- ધોરડો: 'વિકસિત ભારત 2047' અંતર્ગત ડિઝાસ્ટર મેનેજમેન્ટ પર મંથન
- ભારતે રચ્યો ઇતિહાસ: રેકોર્ડ છઠ્ઠી વખત U19 વર્લ્ડ ચેમ્પિયન
- ભચાઉ: કડોલ ગામની મહિલા અને બાળકી રહસ્યમય રીતે ગુમ
- કચ્છના બન્નીનું રતન 'છારી-ઢંઢ' હવે વૈશ્વિક રામસર સાઇટ
દેશ-દુનિયા અને આર્થિક જગતના તાજા સમાચાર માટે જોડાઓ:
👉 Join Kutch Bulletin on WhatsApp
0 ટિપ્પણીઓ