ચાંદી મોંઘી થશે કે સસ્તી, સોનાનું શું થશે? સરકારે કસ્ટમ ડ્યૂટી વધાર્યા બાદ ચાંદીની આયાત 'રીસ્ટ્રીકટેડ' શ્રેણીમાં મૂકી

Kutch Bulletin | Business & Economy

કેન્દ્ર સરકારનો મોટો નિર્ણય: ચાંદીની આયાત પર મુકાયા કડક નિયંત્રણો; જાણો બજારમાં સોના-ચાંદીના ભાવો પર શું થશે અસર

Kutch Bulletin - નવી દિલ્હી : ભારત સરકારે દેશની આર્થિક નીતિ અને વિદેશી હૂંડિયામણને ધ્યાને રાખીને ચાંદીની આયાત (Silver Import Policy) માં એક ખૂબ જ મોટો અને મહત્વપૂર્ણ ફેરફાર કર્યો છે. વાણિજ્ય અને ઉદ્યોગ મંત્રાલય હેઠળના ડાયરેક્ટર જનરલ ઓફ ફોરેન ટ્રેડ (DGFT) દ્વારા સત્તાવાર જાહેરાત કરીને ચાંદીની આયાતને "ફ્રી" શ્રેણીમાંથી હટાવીને તાત્કાલિક અસરથી "રીસ્ટ્રીકટેડ" (નિયંત્રિત) શ્રેણીમાં મૂકી દેવામાં આવી છે.

Sponsored Content

📜 લાયસન્સ વગર હવે આયાત અશક્ય

આ નવા સુધારા બાદ હવે ભારતમાં કોઈ પણ વેપારી કે ઉદ્યોગપતિ ડ્યૂટી ચૂકવીને સીધી ચાંદી આયાત કરી શકશે નહીં. હવેથી ચાંદીની આયાત કરવા માટે તેમજ તેના સત્તાવાર લાયસન્સ માટે ડાયરેક્ટર જનરલ ઓફ ફોરેન ટ્રેડ (DGFT) ને અલગથી અરજી કરવાની રહેશે. સરકાર તરફથી લાયસન્સ મંજૂર થયા બાદ જ ભારતમાં કાયદેસર રીતે ચાંદી લાવી શકાશે. જો કે, રાહતની વાત એ છે કે સોના પર હજુ સુધી આવી કોઈ આકરી શરતો લાગુ કરવામાં આવી નથી.

💸 વિદેશી હૂંડિયામણ બચાવવા માટે આયાત ડ્યૂટીમાં વધારો

ઉલ્લેખનીય છે કે, વડાપ્રધાન નરેન્દ્ર મોદીની વિદેશી હૂંડિયામણ (Foreign Exchange) બચાવવાની અપીલને પગલે ગત ૧૨ મેના રોજ જ સરકારે સોના અને ચાંદી પરની આયાત ડ્યૂટી ૬% થી વધારીને સીધી ૧૫% કરી દીધી હતી. સરકારનો મુખ્ય ઉદ્દેશ્ય એ હતો કે ટેક્સ વધવાથી દેશમાં આ કિંમતી ધાતુઓની ખરીદી અને આયાત ઓછી થાય, જેથી ભારતનું વિદેશી ચલણ બહાર જતું અટકે. આ નિર્ણયના બરાબર ચાર દિવસ બાદ, ૧૬ મેના રોજ ચાંદી પર આ નવો અંકુશ મૂકવામાં આવ્યો છે.

🤝 UAE ફ્રી ટ્રેડ કરારનું કનેક્શન: ગ્લોબલ ટ્રેડ રિસર્ચ ઇનિશિયેટિવ (GTRI) ના ડિરેક્ટર અને પૂર્વ સરકારી અધિકારી અજય શ્રીવાસ્તવના જણાવ્યા અનુસાર, ભારત અને UAE વચ્ચે વર્ષ ૨૦૨૨માં એક કરાર થયો હતો. જે મુજબ UAE થી આયાત થતી ચાંદી પર દર વર્ષે ૧% ડ્યૂટી ઘટાડવાની હતી. જેના કારણે UAE થી માત્ર ૮% ડ્યૂટી પર ચાંદી આવતી હતી, જ્યારે બ્રિટન જેવા દેશોમાંથી ૧૫% ડ્યૂટી લાગતી હતી. આ નીતિગત છટકબારીનો લાભ લઈને ઉદ્યોગપતિઓ UAE ના રસ્તે સસ્તી ચાંદી ભારતમાં ઘુસાડતા હોવાની આશંકાને પગલે સરકારે આ લાયસન્સ પ્રક્રિયા ફરજિયાત બનાવી છે.

📈 શું ચાંદી મોંઘી થશે કે સસ્તી? સોના પર શું થશે અસર?

સરકારના આ આકરા નિર્ણયની સીધી અને ત્વરિત અસર સ્થાનિક બજાર પર જોવા મળી શકે છે. આયાત પર લાયસન્સ રાજ આવવાના કારણે બજારમાં સપ્લાય મર્યાદિત થઈ જશે, જેના કારણે આગામી દિવસોમાં ચાંદીના ભાવોમાં મોટો ઉછાળો આવી શકે છે એટલે કે ચાંદી મોંઘી થવાની પૂરેપૂરી સંભાવના છે. બીજી તરફ, સોનાની આયાત પર માત્ર ૧% નું જ ડિસ્કાઉન્ટ હોવાથી ત્યાં કોઈ મોટો તફાવત નથી, તેથી સોનાના ભાવો પર આ નીતિની કોઈ નકારાત્મક અસર નહીં થાય પરંતુ વૈશ્વિક બજારના આધારે સોનાના ભાવ સ્થિર અથવા સામાન્ય વધઘટ સાથે ચાલશે.

વધુ વાંચો:

• ▶ વસ્તી ગણતરી ૨૦૨૭: કલેક્ટરની નાગરિકોને અપીલ
• ▶ ભુજ રેડક્રોસ બ્લડ સેન્ટરને રાષ્ટ્રીય બહુમાન

કચ્છ અને દેશ-વિદેશના આર્થિક તથા માર્કેટ અપડેટ્સ માટે જોડાઓ:

Join Kutch Bulletin on WhatsApp